Ofbeldi í skólum

 

Það ofbeldi sem við höfum á síðustu vikum fengið fréttir af í skólum landsins er algjörlega óásættanlegt.  Börnin okkar eiga rétt á því að finna til öryggis í skólanum sínum.  Þar eiga þau ekki að verða fyrir ofbeldi af neinu tagi.

Ég hvet skólayfirvöld til að taka af festu á þessu málum í samvinnu við foreldra og samtök þeirra.  Vandamál sem þessi og forvanir gegn ofbeldi af öllu tagi verður að vinna á vettvangi skólasamfélagsins.  Þar spila foreldrar stórt hlutverk.

Segja má að foreldrar sem auðlind í skólastarfi, sé auðlind sem sé vannýtt hér á landi.  Allar rannsóknir sýna að árangur barna er mun meiri ef samstarf foreldra og skóla er mikið og gott. 

Í því erfiða árferði sem við nú lifum í er mikilvægara en nokkru sinni fyrr að skólinn sé vettvangur jákvæðs starfs, vinnustaður þar sem ríkir sátt og samlyndi.  Vinnustaður þar sem börnunum okkar líður vel. 

En nú hafa skólarnir tækifæri til að virkja foreldra betur inn í starfið.  Margir foreldrar hafa misst vinnuna og flest okkar hafa meiri tíma aflögu.  Skólarnir ættu að nýta sér þá þekkingu og umhyggju sem foreldrar hafa yfir að búa.

Höfundur er varaformaður Heimilis og skóla Landssamtök foreldra