Útivistabærinn Mosfellsbær

Mosfellsbær er innrammaður fallegri náttúru og óvíða eru tækifæri til íþróttaiðkunar og útivistar meiri en hér. .  Ég get skokkað eða riðið út meðfram strandlengjunni. Farið með börnin mín í fjöruferð, skógarferð eða í fjallgöngu. Skellt mér á sæþotu á Hafravatni eða farið í golf. Og allt er þetta nánast í túninu heima.  Örskotstund tekur svo að keyra inn í höfuðborgina þegar á því þarf að halda. Það geta ekki mörg sveitafélög státað að jafn góðu bæjarstæði og Mosfellsbær. Sveitarfélagið hefur vaxið gríðarlega á síðustu árum og í því felast spennandi tækifæri, t.d með uppbygging miðbæjar og aukin þjónusta við íbúa. Fyrirhuguð uppbygging ævintýragarðs í Ullarnesbrekkum er gott dæmi um framtíðarsýn og áherslu á grænan og fjölskylduvænan bæ.  Það er von mín að sveitafélagið hafi sem fyrst bolmagn til að koma þeim skemmtilegu og spennandi hugmyndum sem uppi eru um garðinn í framkvæmd.  En svæðið er til staðar og er í dag ævintýralegur staður. Það er mikilvægt að halda vel utan um þau fjölmörgu útivistasvæði sem við eigum því þau auka án efa lífsgæði okkar íbúanna.  

Bæjarbragur með grænum miðbæ

Nýtt miðbæjarskipulag hefur verið unnið á síðustu misserum.  Í þeirri vinnu var mikil áhersla lögð á að fá fram hugmyndir um þarfir og væntingar íbúa til miðbæjarins.  Nýja miðbæjarskipulagið hefur hlotið víðtæka umræðu og kynningu þar sem leitast var við að fara nýjar leiðir við að virkja íbúana í umræðunni og kalla eftir þeirra sjónarmiðum. Ég get fullyrt að ekkert skipulag hafi fengið jafn mikla og góða umræðu og kynningu. Það er mjög mikilvægt að klára sem fyrst heilstætt skipulag fyrir þetta svæði svo hér geti byggst upp fallegur miðbær.  Enginn gerir ráð fyrir því að miðbærinn byggist að fullu upp á næstu árum en skipulag er forsenda þess að uppbygging geti hafist.  Nú þegar hefur verið ákveðið að framhaldsskólinn verði staðsettur í miðbænum en það er lyftistöng fyrir hann og tryggir aukið mannlíf.  Einnig hefur farið fram samkeppni um kirkju og menningarhús sem staðsett verður í miðbænum.  Sú glæsilega bygging verður eitt af einkennum hans.  Nýtt miðbæjarskipulag leggur jafnframt mikið upp úr grænni og náttúrulegri ásýnd.  Með skrúðgarði við Bjarkarholt og fallegu klöppunum okkar verður náttúrunni sá sómi sýndur sem hún á svo sannarlega skilið.  Á því tæpa ári sem liðið er frá því ég tók við formennsku í skipulags- og byggingarnefnd hef ég leitast við að halda áfram því góða starfi sem unnið hefur verið í nefndinni á síðust árum undir forystu Haraldar Sverrissonar bæjarstjóra.  Ég hef lagt mikla áherslu á virkt upplýsingaflæði og að fá fram skoðanir og viðhorf íbúa.  Skipulagsþing var haldið í haust en markmið þess var að fá sem flesta íbúa til að tjá skoðun sína og sjónamið um þróun skipulags í sveitafélaginu okkar.    Bryndís Haraldsdóttir formaður skipulags- og byggingarnefnd gefur kost á sér í 2. sæti í prófkjöri sjálfstæðismanna sem fram fer 6. febrúar næstkomandi 

Athugasemdir

[Sigurður Hreiðar, 16.1.2010 kl. 12:04]

Skeleggur pistill Bryndís, og ómögulegt annað en vera sammála þér um margt af því sem þú telur túninu heima til ágætis. En sums staðar vantar herslumun. Hvers vegna er til dæmis ekki gengið fram fyrir skjöldu og göngu- og hjólastígur Mosfellsbæjar, sem endar við Aðaltún, lagður áfram í námunda við Vesturlandsveg þangað til hann nær saman við samskonar brautir Reykjavíkur við Úlfarsárbrú? Hvers vegna er ekki göngu- og hjólastígur sem tengir saman göngustíginn ofan við Skálatún og samskonar brautir við Klapparhlíð? Hvers vegna er ekki búið að gefa öllum hringtorgunum nöfn og merkja þau?

Ég veit að þetta eru smámunir. En það eru smáu atriðin sem mynda heildina. Ég sem bý hér í næst næsta húsi við Reykjavík, nánast þar sem vegurinn endar, hef orðið fyrir því í tvígang að hjólandi ferðamenn á sumir hafa leitað ásjár um hvernig þeir geti haldið áfram og komist til Reykjavíkur öðru vísi en fara á hjólunum á þennan „lethal highway“ eins og annað parið orðaði það.

Og vel á minnst: Það vantar vegrið á þennan lethal highway fremur en slakkann sem þar er milli akstursstefna. Við sáum í þreföldu banaslysi á Hafnarfjarðarvegi fyrir jólin hvernig slakkinn getur virkað. Eigum við að bíða eftir slíku hér á okkar leið?

[Bryndís Haralds (IP-tala skráð) 20.1.2010 kl. 17:43]

Takk fyrir þetta Sigurður það er rétt hjá þér að þó margt sé vel gert er einnig margt sem eftir er.  Varðandi hjólreiðasamgöngur við Vesturlandsveg er það brýnt að koma því í farveg og heg ég lagt áherslu á það við endurskoðun aðalskipulagsins að hjólastígur verði settur á skipulag meðfram Vesturlandsvegi. 

Hvað hringtorgin varðar hafa þau öll fengið nöfn enn hafa þau ekki verið merkt en vonandi verður það gert fljótlega.  En torgin heita;

Á Vesturlandsvegi norður úr;

Hamratorg, Skarhólatorg, Lágafellstorg, Kóngstorg, Álafosstorg og Þingvallatorg

Á vestur svæði;

Klappartorg, Höfðatorg og Hlíðatorg.

Í miðbænum Kjarnatorg.

Hvað Vesturlandsvegin varðar þá er hann á forræði ríkissins en Mosfellsbær hefur lagt mikla áherslu á að auka umferðaröryggi á veginum.  Því eru fréttir dagsins í dag þess efnis að næsti áfangi breikkunar Vesturlandsvegar sé nú á leið í útboð gleðifréttir fyrir bæinn okkar. 

[Sigurður Hreiðar, 21.1.2010 kl. 10:54]

Þakka þér fyrir svarið, Bryndís. Gaman að sjá að torgin á Vesturlandsveginum hafa fengið þau nöfn sem ég gaf þeim fyrir býsna mörgum árum í bloggi mínu, þegar ég í upphafi vakti máls á nauðsyn þess að torgin fengju sín nöfn. Nema Hamrahlíðartorgið þar sem hlíðin hefur verið skorin úr. Það þykir mér skaði. Ég var dálítið efins um nafnið á Kóngstorginu og hef síðari misserin haft tilhneigingu til að kalla það Reykjatorg, en er alveg sáttur við Kóngstorg, sem minnir á gamla Kóngsveginn.

Fyrsta torgið, komið frá Reyjavík, er formlega séð í Reykjavík. En því gaf ég nafnið Lambhagatorg. Getum við ekki komið því á líka?

Sé að eitt torgið hefur orðið út undan með nafn. Er það ekki Krikatorg?